Pagkahalal ng bagong house speaker Alan Peter Cayetano: Makabubuti ba o hindi sa probinsya ng Romblon?
ni Jose Rizal M. Reyes / ika-22 ng Hulyo 2019; updated Hulyo 24
Sa ganang akin, pabor sa Romblon ang pagkaluklok ni Cong. Cayetano ng Taguig-Pateros bilang bagong House Speaker. Parehong pragmatic politicians sina Cong. Cayetano at ang ating kongresista na si Budoy Madrona. Pareho silang nakalinyada sa ruling coalition ni Pres. Rodrigo Duterte. At pareho silang myembro ng Nacionalista Party sa pamumuno ni dating house speaker at dati ring senate president Manny Villar.
Kaya sa palagay ko, di mahihirapan ang ating congressman na pakisamahan at pakibagayan ang bagong house speaker.
Higit sa lahat, ibinoto ni Cong. Madrona si Cong. Cayetano para house speaker. Base sa patakaran at tradisyon ng Konggreso, ang pagboto ni Cong. Madrona sa nanalong house speaker ay nangangahulogang kasapi sya ng ruling party sa Mababang Kapulungan. Kaya pagdating sa committee chairmanship at membership, may pagkakataon ang ating congressman na makapamili at makasali sa mahahalagang house committees.
Syempre pa, ang dapat na resulta nito ay yong hindi naman madehado ang munti nating lalawigan pagdating sa partehan ng pondo mula sa national government. Dahil maliit lang tayong lalawigan, dapat kahit man lang pagdating sa pondo ay makabawi tayo para hindi naman laging namamaliit ang probinsya ng Romblon.
Ayon sa mga ulat, ang paghalal kay Cayetano bilang bagong House Speaker ay hiniling ni Pangulong Duterte sa mga konggresista. Ito ay pagkatapos ng isang maigting na pagkakaribal ng maraming aspirante para sa nasabing posisyon. Matatandaang si Cayetano ang vice presidential running mate ni Duterte noong 2016.
Ang iba pang napabalitang aspirante sa house speakership ay sina Lord Allan Velasco ng Marinduque, Martin Romualdez ng Leyte, dating house speaker Pantaleon Alvarez at ang anak ng pangulo na si Paolo Duterte ng Davao City. Subalit ngayong araw — para ipakita ang party unity — sina Duterte, Velasco at Romualdez mismo ang nag-nominate kay Cayetano para sa pagka-house speaker.
Mayroong 297 mambabatas ang presente nang maganap ang botohan. Nakakalap si Cayetano ng 266 na boto. Si Bienvenido Abante ng Manila ay nakakalap naman ng 28ng boto. Dalawa ang nag-abstain at isa ang hindi bomoto.
May kaunti lang na kumplikasyon sa pagkahalal ni Cayetano bilang house speaker. Nagpahayag si Pangulong Duterte na sina Cayetano at Velasco ay magkakaroon ng term sharing habang si Romualdez naman ang magsisilbing majority leader.
Gayonpaman, ang resulta ng halalan sa Mababang Kapulongan ay senyales ng matatag na pagtangan ng pangulo sa renda ng kapangyarihan. Dalawang daan apat na pu’t anim (266) ang sumunod sa kanyang kahilingang si Cayetano ang iluklok sa pwesto. Liban pa rito, sa ilalim ng patakaran ng kamara, ang natalong kandidato para sa pagka-house speaker ang syang magiging house minority leader. Nagkataong si Abante ay kaalyado rin umano ni Pangulong Duterte.
Ayan, kayo na ang gumawa ng sumada.
Related Articles:
- A Simaranhon asks: Botika o Botik?
- Team Botika’s Pro-Poor Program for Hospitals and Health Services amidst various developmental challenges facing Romblon province
- A shoeshine man called Ito
- Regarding Pragmatic Idealism
- Facebook groups and pages for Romblon and Romblomanons
- Firmalo at Madrona.. parehas namang mabait at may kakayahan pero…
- Quantum of proof required in administrative, civil and criminal cases
